Xica quih quiistox com tcoo ziix quih mizj hant imap quih caaiziha. Yooz quij cöihoocta ac ziix quiisax quiipe quisil ipi hant z iti timiihma Yooz quij ziix quih hipi iti cöipacta iti cöisapacta ha taax iti cötompactojiho. Romános 3:23

Ziix quih mizj hant imap quih hapaii tintica tiix ziix quih cmique ihaipot quih taax ano tahcax iquiisax com hant quih quicoopol com isyaaiaha. Ox oo mpacta xo Yooz quij ziix quih ique taax iquiisax quih cmaa quiih quih hacx immiih taax cösiisaxaha Yooz quih cöpoofpx. Taax Jesucristo ihimoz quih he caai quij icp ac ic cöicaap ac taax iti mocaha. Romános 6:23

Yooz quij ziix quih he hamsisiin taax iti hmatat he hapx hant cöqueemeha. Taax Jesucristo quij hiistox cötomtajc hiistox quih coox com iti cöhihiistox ac iti mocaha. Taax he ziix cöiquiipe hipi hayaaizi z iti mimaha. Yooz quij iquiisax com hapx hant cöisoita taax ziix quih hanso hapeque taax itahaama toc cöcahcaha. Ziix cöquiipe hipi hapaai zo haa poohca taax iti mimaha. Taax oo compacta taax taax iti moca z isoj cöipacooyam hant z iti smiih tama. Efésios 2:8-9

Ox oo mpacta xo ctam tom quih quihehe quij iqui siin ca quih quixalim cop tiix toox xah iti tap toc cömiip. Hamiime com icp taax ipi itoj coi iqui tconcaailquiho. Taax iti tap ipiz itac quij itnipatim ox mee: "Yooz hoocta. Miisax com he hamsisiin. Ziix quih imiipe quih caaizi tacom he taax zo haahi", ox mee. San Locas 18:13

Mos ox imii: --Yooz quij ziix quih quiisax coox cah camsisiiniha yax yaazi quih tazo tiquijo toc cöquiij ihaha xo hant com iqui imaaca. Tiix ihiisax com cöcacaaatj zo haquix piihx ihiisax com hant quih quicoopol com contsamaha. Iquiisax quih cmaa quiih quih hacx immiih taax cösiisaxaha Yooz quij cöpoofpx. Taax oo hant cömiip taax Yooz quij yaazi quih hant com iqui maaca taax ziix quih cöimiipla zo cöisaaiipita oo cöimahiha. Ox oo mpacta xo hant com iqui mpacatax tiix xica quih quiistox com Yooz quij ziix quih imiipe cop iti ziix quih iti cmique cöisahcaant ta taax hapx hant hizi saailx ta toc cömocaha. San Juan 3:16-17

Ziix quih imiipe quih iti cöhisiii tama taax ox cöhihimöjc taax haa miihca taax xica quih quiistox com mos tcoox taa cöhapactaha. Ox oo mpacta xo Yooz quij hizi imacatxiha. Taax iti ziix quih mizj hant imap cop cöhiscmaaiziha taax hicot isaaiah. Ziix quih imiipe quih taax chaa taax quisoj quij cöiifp isax Yooz quij hicot ipaiitimtax ziix quih imiipe ac hasiizitojaha. 1 Coríntios 10:13

Taax oo compacta taax Yooz quij he hamsisiin ac ziix quisil ipi haquix piih Yooz quij he hamsisiin taax cösaacatx ca zo haquix cöimiih ac hocoaaha. Hacx icamiih cop cöhihiixant zo cöipomaacatx ziix quih imiipe quih hipi hisolca coi iti cöipacta zo haa piihta cöipomaacatx icaitom quih coonec hamiime com ano mocat coi xox he hamsisiin zo cöihaalajc itcmaaj iquiisax quih ziix quih ccam quih chaa taax zo haquix piih cöihaacatx itcmaa quihehetoj hizcom cöihaalajc imaajiha. Ziix quih cmaa hant com iti cahca hiz xah ac ziix quih iti cöspacta ca quih yeen icp ac icp moca xah taax cooxo Yooz quij he hamsisiin ac cöihaacatx quiya zo haquix imiihiha. Ziix quih hamiime com ano quiih xah ziix quih hant hipcom iti quiih xah Yooz quij ziix quih ooxi quih hant quih iti quiih coox xah ziix quisil ipi haquix piih Yooz quij he hamsisiin taax cösaacatx ca zo haquix imiihiha. Jesucristo ihimoz quih he caai quij iti motama Yooz quij hizi mamsisiin. Romános 8:38-39

Ziix quih quiisax quih Cristo quij icp ac iti quiisax quih hant quih iti tiijx Moisés quih Yooz quij aa itahma ziix quih icacoaat quih hant com iti yaahca ac taax cöpacaai iti isoj cöipaaita siipe ta cöimoz ac cmaax iti isoj cöimaaiha. Cristo quij icp ac iti quiisax quih hant quih iti miij taax taax oo iti haptco ziix quih cöiquiipe taax iti cöhapactaha Yooz quij iqui cöihiin ac. Romános 10:4

Yooz quij iitom quih hapaspoj quih it hant cöiyaii ac ox mee: Zaah zo haa poop cöpoofptax ziix quih cöhihamsisiin taax taax iti cöishapxaha. Him mpozaxöttax ziix quih iti he mizaxöt qu toc cöpoohcatax mizj patax ihsquecölaha. Zaah iti quiistox coi iti hapx hant cöisiimeha taax pohaa toc cöpoohcatax he micot ihsaaiaha, Yooz quij iitom quih hapaspoj quih it hant cöiyaii ac ox mee. Hooctam. Zaah hipcop iti mapaii Yooz quij mos ano iti mapiistox hipi isoj quij cömiizcam quiimzoha. Zaah hipcop iti cöiihca taax Yooz quij hapx hant mazi ihaailx quiimzoha. 2 Coríntios 6:2

Ox tpactama xica quiistox tacoi Pedro quih iitom ac quiii coi ziix quih mizj hant imap quih yaaizi tintica isolca cöitaaj anxö imöjc tmeeyat toc cömoii. Xica tacoi Pedro xah xica yataacatim ihmaa coi cöitmiiitoj ox imeaam: --Hoyacalcam. ¿Az iti hisoj cöhasaaizi haaya? --ox imeaam. Ox tpactama Pedro cop taitom ox iyoi: --Hooctam. Jesucristo quij icp ac ic cooi pac icahaa mapoomcajx ziix quih mizj hant imap quih mayaaizi tintica miistox com hanaailcoj. Jesucristo quij icp ac iti immipatta ano mazi tmahtiistim. Taax oo cöpopactatax ziix quih mizj hant imap quih mayaaizi tintica Yooz quij ziix quih iti cmique cöisacaant ac taax iti misolca coi cöisiiixaha. Ox popactatax Yooz quij Ihiisax quih miti scaitaxaha. Hetzos 2:37-38

Hant com iti cömiilx taax icaaitim quih cmaa quiih taax iti misolca cöhapactox. Yooz quij tiix ziix quiipeha. Me mos misolca coi piipeta toc cömisoomaha. Ziix quih quiisax quih quiipe isojaa mapohaa hant com iti misoomaha. Ziix quih imiipe taax misolca iqui mascmaalajcaha. Efésios 4:24

Romános

Xica quih quiistox com tcoo ziix quih mizj hant imap quih caaiziha. Yooz quij cöihoocta ac ziix quiisax quiipe quisil ipi hant z iti timiihma Yooz quij ziix quih hipi iti cöipacta iti cöisapacta ha taax iti cötompactojiho. Romános 3:23

Yooz quij iitom quih hapaspoj quih it hant coii coi ox tpacta it hant moii: Ziix quiisax ziix mizj hant caap z iti cöcaaitim tazo ipi haquix imiihiha Yooz quij iqui cöihitoij ac. Romános 3:10

Ziix quih mizj hant imap quih hapaii tintica tiix ziix quih cmique ihaipot quih taax ano tahcax iquiisax com hant quih quicoopol com isyaaiaha. Ox oo mpacta xo Yooz quij ziix quih ique taax iquiisax quih cmaa quiih quih hacx immiih taax cösiisaxaha Yooz quih cöpoofpx. Taax Jesucristo ihimoz quih he caai quij icp ac ic cöicaap ac taax iti mocaha. Romános 6:23

Cmique hapaxii Ada'n hapah quij ziix quih mizj hant imap quih yaai tahac iti motama hant com tcoo compaatjc. Mos ta iti motama ziix quih hacx cöicamiih taax hant com iti cahcaha. Taaxah oo cötpactama he tcoo ziix quih mizj hant imap quih caaiziha yax ziix quih hacx cöiscamiih ha taax hisolca coi iti ihiihiha. Romános 5:12

Yooz quij iqui cöhihitoij ac hisolca coi coi tmailajc ipi ziix quih iti cöpopactata hapx hant cöhisiime ha taax iti cöhatcompactoj toc cöhatoiima Cristo com hacx immiih taax xica quih quiistox quih hant com iti coom com ziix quih mizj hant imap quih isolca coi iti cahca taax cöisacoiix ha taax oo cöipahiha. Yooz quij hipi cöiqueepe taax oo contitama hant com iti yaahca. Romános 5:6

Ox oo mpacta xo hipi hisolca coi ziix quih mizj hant imap taax hisolca coi iti toiima he toc cöcoiiha xo Cristo com hipi iti mota ihiisax com cömaipot. Taax oo cöipacta taax hatooctam Yooz quij he hamsisiin taax hocoaajiha. Romános 5:8

Jesucristo com hacx cöimiih ac Yooz quij Ihiisax quij itaaima tiisax toc cömiij. Taax iti motama ziix quih cameepit quih iti cöipacta tintica itaht ittiixma taa hant cötapma cmaax Yooz quih asaac ihaa quih cötpaama toc cömiihca. Romános 1:4

Ipacta ac mizj hocoaajiha Cristo com hacx tmiihma cöihahiisaxot ac. Itacl ipi ziix quih hacx cöicamiih taax iti cösamaha. Ziix quih hacx cöicamiih taax haquix imiih hax pahii hax saaha. Romános 6:9

Xica quih quiistox ihmaa com iqui hapitoij hapozaxöt Jesucristo quij iqui he ihiin ac tiix ihimoz quih he caai tiix haa heepyo cmaax Cristo com hacx cöimiih ac Yooz quij cöihahiisaxot ac hihiistox quih coox com ox cöhapimöjc Yooz quij yacaant taax iti ano hmapat hapx hant cöhisiimeaha. Romános 10:9

Yooz quij iitom quih hapaspoj quih it hant cöiyaii ac ox mee: "Hax ziix quiisaxo zo haquix piih iisax quih coox com ox cöpimoz patolec ox peetax Jesucristo ihimoz quih he caai quij ox ipoix Yooz quij yacaant taax ano mopax hapx hant soitaha", ox mee. Romános 10:13

Taax oo compacta taax Yooz quij he hamsisiin ac ziix quisil ipi haquix piih Yooz quij he hamsisiin taax cösaacatx ca zo haquix cöimiih ac hocoaaha. Hacx icamiih cop cöhihiixant zo cöipomaacatx ziix quih imiipe quih hipi hisolca coi iti cöipacta zo haa piihta cöipomaacatx icaitom quih coonec hamiime com ano mocat coi xox he hamsisiin zo cöihaalajc itcmaaj iquiisax quih ziix quih ccam quih chaa taax zo haquix piih cöihaacatx itcmaa quihehetoj hizcom cöihaalajc imaajiha. Ziix quih cmaa hant com iti cahca hiz xah ac ziix quih iti cöspacta ca quih yeen icp ac icp moca xah taax cooxo Yooz quij he hamsisiin ac cöihaacatx quiya zo haquix imiihiha. Ziix quih hamiime com ano quiih xah ziix quih hant hipcom iti quiih xah Yooz quij ziix quih ooxi quih hant quih iti quiih coox xah ziix quisil ipi haquix piih Yooz quij he hamsisiin taax cösaacatx ca zo haquix imiihiha. Jesucristo ihimoz quih he caai quij iti motama Yooz quij hizi mamsisiin. Romános 8:38-39

Yooz iti hmitat hamiime com ano quiij ziix quih cameepit quih iti cömiha ac ziix z iscontopl.

Yooz iti hmitat hamiime com ano quiij ziix quih cameepit quih iti cömiha ac ziix z iscontopl. Ziix quih cömeaal ac hino camjc. Hamiime com ano cöiihca ac hipi ziix quih iti cöihapacta moomzo quih iti commapacta hant com mos taa cöhapacta. Ziix quih hapahit quij zaah quih pti ipac caao tintica iti cöhasiitoj xah taax hisolca coi ic cösmahcail. Ziix quih mizj hant imap quih he caaizi quih cöhayomaxapxat taax ziix quih mizj hant imap quih hayaaizi quih he cmaxpx mos tahac oo cöhamisot. Hicot haai hant quih hapaii ziix quih mizj hant imap quih cöhisaaizi taax hisolca coi oo cocmah. Taax oo compacta taax hant quih iti mihiij ac hipi moaaliha. Ziix quih cameepit tintica hipi nyaaha. Ziix quih iti me sahcooyama taax hipi misoj quijo iti cahcaha. Hant quih imiyat tintica iti cöiihca ac hipi nyaaha. Taax oo cöspacta taax oo cöspacta. San Matéo 6:9-13.