Imik Neyung Yuba

Anasa, nimi nidya' ara seleb malya umeekanya, Imik Neyung adya alja' senenggoma' si imik nenena' ara, seleb sokol lona' dangalamla, Roma 3:23

Malya una' adya dekna' ara, somokna' damok ak ulumla, bok Imik Neyung adya perob elekna' era, nunja Wenelesilnya Kristus Yesus lomok ulumla embenga' ulmoubna' una' ak ulumla. Roma 6:23

Imik Neyung ara ugunuk wana' uboka eleksina' anasa leboka, ugunda Yesus ak dib senewoka dobluma' adya, ugunuk dib blebsuk. An blebsuka' ara, ugunja ununa' edya dobnenggublum. Anara Imik Neyung adya ok elek loboka blebsuk. Anaso ubsuk bok dara, nimi hnon ara nabeyok dobsa aboka nonggo henggunumso. Efesus 2:8-9

Bok mok soko amba rupiah molowoka dolomoknya bera, alda mok sam sekoka, imik sam kemel weiningna' anaba loboka, sara' sibuka obdangoka lero mololemokja, Wei Imik Neyung o, nak malya una'anya bek an angoo yadyek senewoka arawanelom e, aboka mololemok,>> hyok. Lukas 18:13

Al Imik Neyung adya nimi soko nim ek, hyak wana' ulusuukanya, alja me hyak hnonok bok, nimi soko nim amba bokol yeilisuk. Nimi nidya' hnonok-hnonok alak dib senewoka dobnamak dara, somoganggunumak bok, embenga' una' diba' dorowanamak aboka, alja me bokol yeilisuk. Imik Neyung alja yando me sokok sam bokol yeilimoka' ara, anyagan yana lelelesulula' aboka bokol yanggumok bok, alda alja me nedya soko nim ek blebsulula' aboka bokol yeilimok. Yohanes 3:16-17

Ugunuk an sunulyamalesil sununa' ara, yok nimi nidya' anaba, sunulyamalesil soknya nek ulusil. Dara, Imik Neyung ara hyak bojam ululanya ulumlakanya, ugunuk yoka' adya senenggoma' sunulyamelesil dara, Imik Neyung adya ugunja migiba sunuwoka, uka nauba sunulwenenggom henemla. Dara, ugunuk sunulyamalesil sum era, ugunda pe siklewoka ululuma' aboka, Imik Neyung adya pika bak lobnesil. 1 Korintus 10:13

Anasa nadya dib senelamna' ara, or somokna' embenga', lero nang gong, bisa' wenesin dub nang, or wen ulumla' eimik lanawanamla', or yok-yok migib damok, imik ulumla', damumduk ululanya gom, or yok embenga' ulumla digum, ban nidya' anedya, nunda Imik Neyung adya wana' usina' ak ab, nunja Wenelesilnya Yesus Kristus ak ulumla' an, ara ane digum adya douluwoka bok meneganggunusil. Roma 8:38-39

Unuwanalum an yub pik peldisina' damok elemeka' ara, Kristus yeilimok adya alak peldisina' damok dok. Wera anedya nimi nidya' ganya alak aldib senelemak nang era, peldisina' en dolomak. Roma 10:4

Imik Neyung yuba bukuk ara, Imik Neyung adya, <<Nadya sumen arawanenggen senemsa sum era anja molona' era, seleb kebgesa, nadya blebnamna senemsa sum era, anak aranggesa,>> aro lebok. Ono' hnon leboka' ara, <<Wera sumen era, arawanenggen senelamna sum dal. Wera sumen era, blebnesin senelamna sum ulumla,>> aro lebok. 2 Korintus 6:2

Wera nimi nidya' Petrus bedya wenyaboka lelemok anyek kemek dara, nimi nidya' ganya soldowoka obdangamek. Dara, Petrus bek hnon, yok yuba lena' gak nang ek hnon, <<Hemyab o, wera nunda heka' huwanamab do?>> aboka heisik. Dara, Petrus bedya sikenek, <<Ugunda nidya' ara, ganya dangawoka malya una' meewanasil dara, ganya dangawoka, Yesus Kristus si sibuka mek dana' doblulum. Dara, ugunda Imik Neyung adya Geisinya eleganesil ara dobnelum,>> hyok. Kisah para Rasul 2:37-38

Anya, wenyok uldilisil nong una' era, Imik Neyung ara hyak perob ok uboka, geisa ulumla sok ulumla nong una' enyek, anaso' anyek unura ulunoba' aboka doblum. Efesus 4:24

Roma

Anasa, nimi nidya' ara seleb malya umeekanya, Imik Neyung adya alja' senenggoma' si imik nenena' ara, seleb sokol lona' dangalamla, Roma 3:23

an wenyaro momnya doboka' ulumla sok, seleb lulum-lulum abmab ara, Roma 3:10

Malya una' adya dekna' ara, somokna' damok ak ulumla, bok Imik Neyung adya perob elekna' era, nunja Wenelesilnya Kristus Yesus lomok ulumla embenga' ulmoubna' una' ak ulumla. Roma 6:23

Wera anasa, neikik malya una' ara sokok anara hnonoknya pik ab lanawookanya, an malya una' enedya somokna' damok lanawok. Wera an unuwoka nidya' nang ara seleb malya umek anasa, ban somokna' damok era nimi nidya' ak ob lelewok. Roma 5:12

Wera anasa, nunda anam hmeng ulusuk salek, Imik Neyung adya ban salek enyek senemoka' sunuwoka, Kristus ara nunda wona' dangamoub nang emba seleb somogosuk. Roma 5:6

8 Anaso bok, nunda anam malya una' bo ulumoub salek, Kristus ara nusamba seleb somogok pik uboka, Imik Neyung adya alja yadyek ulusila' laga dangalamla' ara an. Roma 5:8

bok Geisinya bedya geisa migib enedya, alja somokna' gangganek ab suboka embenga' bukuk anyeb, alda Imik Neyung me hyak migibnya, nunja' neyung Wenelesilnya, Yesus Kristus ulumla' laga nenebdoka' ara an. Roma 1:4

Wera anasa, nunda Kristus ab neika' somogoub dara, nunda eimik era al ab neika' uru balamnemaba' ara, aldib senewoka nunda ella ulumab. Roma 6:9

Anasa ugunda ugunja si bama' adya Yesus ara wenelesilnya bek ulumla aboka laga lelemunukanya, ugunja ganya ara alda Imik Neyung adya somokna' nang gangganek ab seleb subuka embenga' bukiyiwok dib senelemun dara, blebnesil. Roma 10:9

Anasa heknedya Wenelesilnya si sibuka youblenya bera, alak blebnamla. Roma 10:13

Nunja neyung imik heikek ululamnya o

Nunja neyung imik heikek ululamnya o, anja si nera muna' gobdo geisa ululul. Anda nunja' dubnya ululam. Anadya wera sokok an wenelemnesilim. Anja senelelama' ara, imik heikek sam gigiwoka unulamla sok, sokok anaba unululul. Nunja sumen denemabnya nek sunuwoka, or doboka elegeisilom. Yok nim eb malya ubdangamna nim eb memeldalamab sok, anda anaso uboka nunja malya una' eneba doboka bobogeisilom. Nunda nauba sunulusil ak sam bo yangganggunesilim bok, alda hyak meilinya bek ab blebnesilem. Anda hyak senenggom migib dubnya uboka, anja si nera soba' imik ulmorulumnamla. Amin. Matius 6:9-13

Kejadian

Kejadian 1
Imik Neyung ara im ab, soko ab, nidya' ulumla' ab uyiwok yub

1 Hyak men nong dara, Imik Neyung ara im ab, soko ab uyiwok.
2 Soko ara anam pe meewanggumukanya, yoka'-yoka' geknena' orok. An eilib ara, mek ok longoblomookanya, guna' adya ok serenggom ablomok. Anya, Imik Neyung Geisinya bera an eilibik diri yabalemok.
3 Dara Imik Neyung ara lebokja: "Dilina' ublul." Hyok dara, dilina' an dok.
4 Imik Neyung ara dilina' eibuk dara, pewal senewok. Dara Alja an dilina' ara guna' ak ab yok-yok bokok.
5 Dara Imik Neyung ara dilina' ubuknya nera, yubyek aboka si sibok, anya guna' ubuknya nera inimnek hyok. Wera iniboka gwelekok dara nera men sum.
6 Ona' Imik Neyung ara lebokja: "Imik mek ab, sokok mek ab, hnomunga' ara glo' ublul," hyok.
7 Dara Imik Neyung ara glo' ola uyiwookanya, alda glo' damunduk ulumok mek eb, glo' dameijik ulumok mek eb dara, an glo' enedya yok-yok nenewok. Dara, Imik Neyung adya lebok sok unuwok.
8 Anya, Imik Neyung ara glo' doknya nera, im aboka si sibok. Wera iniboka gwelekok dara penyaba' sum.
9 Hnonda Imik Neyung ara lebokja: "Im damunduk ubla mek era neik ak yok mamagoulul; unuwalya' adya kelelom arobnya hnon laga ublul," hyok dara, wera lebok sok unuwok.
10 Anya Imik Neyung ara kelelom arobnya nera, soko aboka si sibok, anya meka mamagoknya nera, mek gwan aboka sibuk. Dara Imik Neyung ara kemejok enyek, nidya'ara pewok ak eibuk.
11 Hnonda Imik Neyung ara lebokja; "Soko ara bongolamla' urubya ara, doka ulumla digumnya neb, doka deneseng gal eb, bongowalya' adya, soko dubuk an seknemlamla bar," hyok dara, wera lebok sok unuwok.
12 Dara ban soko dubuk anera, bongolamla' urubya ara, doka ulumla digum ab, doka deneseng gal eb, bongowok. Anya Imik Neyung ara kemejok enyek, pe wok ak eibuk.
13 Wera iniboka gwelegok dara, nera winilyaba' sum.
14 Ona' Imik Neyung ara lebokja: "Yubyek inimnek geknewoulul aboka, imik sam ab yeblemnamla anyek doulul," hyok. Wera ban yeblemnamla dara , wa wen salek hnon, li ubgiga ban sum hnon, henga goluga wele ulumla salek hnon, danggiga balamnamla bar," hyok.
15 Wera ono', ban imik yeblemnamla adya sokok an dilina' ululul," hyok. Dara leboka' sunuboka unuwok.
16 Imik Neyung ara yeblemnamla seneboka nauba' anyek penya uyiwok. Dara, naubenya nera yubyek amba, hnon meknya nera inimnek amba. Anya, gura' olola ak hnon, uyiwok.
17 Ban nidya' anera, sokok an yeblemnamla seneboka, Imik Neyung adya imik sam beibuk.
18 Hnonda inimnek ab, yubyek ab yeblamlyekanya, dilina' ara guna' ak ab yok geblul aboka nenewok. Imik Neyung ara kemejok enyek, pewok ak eibuk.
19 Wera iniboka gwelegok dara, nera dom sum.
20 Ona' Imik Neyung ara lebokja: "Mek lomok ara gamyaka' ulumnamla ak nauba doulul, anya mok soko eilibik ara wininga gwebdo yabelemnemak, wensenewok.
21 Dara Imik Neyung ara, nauba mek gwan longowok ak senenggom embenga' ulumla' ab, mek sam eleb-eleb yok-yok embenga' ebeklamla' ab, eleb-eleb yok-yok wining ola yaka' ak. Uyiwok. Anya, Imik Neyung.ara, kemejok enyek, pewok ak eibuk.
22 Dara, ban nidya' amba Imik Neyung adya alja yub edya peroba' lebok ara: "Mengeboka beibdangdo balemunukanya, nidya' mek gwan dekneboka, sokok dubuk anebabya wininga mandebna' adya, nauba danggiga balelul," aboka lebok.
23 Iniboka gwelegok dara, nera lam sum.
24 Dara Imik Neyung ara lebokja: "Sokok ara yoka'-yoka' embenga' ulumnamla ara: weilimnemaknya neb, mondib belegoka balemnelanya neb, yoka'-yoka' moubsa' uboka beiyik ulumnelanya neb, doulul," hyok. Dara, Imik Neyung adya lebok sok unuwok.
25 Imik Neyung ara yoka'-yoka' beiyik embenga' ulumla' ab, weilimaknya neb, mon adya leleyabelelanya neb, sokok dubuk an, wenseneboka' sunuboka uyiwok. Dara Imik Neyung ara kemejok enyek, pewok ak eibuk.
26 Ban seleb dara, Imik Neyung ara lebokja: "Wera perob, nunda nim ak nunja ganya-una' sunuboka meewanamab. An unu meeweibya' adya, mek gwanek ulumla hadya' gong eb, wining imik yabelamla ab, weilimaknya neb, weinggulumaknya neb, mondib leleyabelelanya neb, mok soko nidya' ara, sikja kemeboka bo ubnemak bar," wenyabdok.
27 Anasa Imik Neyung ara nim anyek, alja ganya-una' sunuboka, alja alak memewok; nenya ab, gel ab, sikda unu uyiwosuk
28 Dara Imik Neyung ara, siksamba peroba' lebookanya, sikinek lebokja: "Mengeboka beibdangdo balamunukanya, hyak nauba danalum. Dara, sokok anera deknero lobnamlakanya, ugunja salawoka bo ulumnelum. Hnonda mek gwanek ulumla' hadya' ab, wining imik yabalamla' ab, sokok an embenga' yabalelanya nidya' ab, ugunja bo ulululum," hyok.
29 Imik Neyung ara ono' lebokja: "Kenderurum. Nara ugunuk sokok dubuk an, doka ululanya nidya' ab, gal doka moululanya nidya' ab dara, ugunja dena' ulumnamla aboka, lebsin.
30 Bok sokok an ebeklamla' nidya' ara, wining imik yabalamla nidya' ab, soko dubuk an nidya' gamyaga' ulumla' ab, nidya' hiba' yaka' ulumla' ak anyek, siksamba dara, sugub-sugub alamla hola' enyek, sikja dena' ulumnamla," hyok. Dara, Imik Neyung adya lebok sok unuwok.
31 Dara Imik Neyung ara, alja nidya' unuboka uyiwok anyek, kemejok enyek, aldib, hyak pewok ak eibuk. Wera iniboka gwelegok dara, nera hnab sum.

Kejadian 2

1 Wera im ab, soko ab, an eilibik-lomok nidya' ulumla' ara an unuboka uyiwok.
2 Imik Neyung ara sek sum era , alja ban nidya' uldilimoka' ara, seleb anasa, alda sek sum era e pebok.
3 Dara Imik Neyung ara, Alja uldilimoka' nidya' ara, seleb seneboka alda e pemok anasa, alda ban sum enesa peroba' leboka, muna' yok sum nenemok.
4 Wera im ab, soko ab, heka huru laga dok yub era an. Imik Neyung adya anam im ab, soko ab uldilimok salek era,
5 soko eilibik ara, hola' hnon seknenggumookanya, masa gala aroba' hnon bongowanggumok. Imik Neyung ara sokok an hnon moka eleganggumookanya, nim adya wa wenya hnon orok.
6 Bok soko eilibik ab ara, deba' hnon weleboka ban soko eilibik enyek an, bebya' nenewok..
7 Anya ban salek era, Imik Neyung ara soko' hnon doboka nimi memeyiwookanya, embenga' una' hiba' alja urum pik poo hyok; wera nim ara an unuboka gamyaka' dok.

Nim Ab, Eren Soko Ab, Yub

8 Wera an unu uyiwoka' seleb dara, Imik Neyung ara, Eren soko una' amba dara, yali sam beibuk. Wera alja uyiwok nim era anyagan beibuk.
9 Dara Imik Neyung ara, yok-yok gal Eden soko eilibik bongoyiwookanya, hnonda ganya gel-gel aboka, anya den galdok ek hnon bongoyiwok. Anya, peroba'-malya' ella dangan gal eb, embenga' ulmoubna' eleksin gal eb dara, hnoumung nongok bongoyiwok.
10 Eden sokok ab yaban mek ara soko wibgiga balamok. Anya ban mek era pika dombadya bokoka ma balamok.
11 Mennya nera emas ulumla soko, Hawila sokok sam gokgobok mab ganaga yabalamoknya nera, Pison mek aboka sibok.
12 Dara ban soko enyek an ulumla emas era, hyak perob nong; hnonda Krisopras girik ab, perob song gal meka eb dara, soko enyek an ulumla.
13 Penyaba' anya nera, Kusi sokok, gokgobok sam mab ganaga yabalamoknya nera, Gihon mek aboka sibuk.
14 Winilyinya nera, Asyur sokok yali sam mal yabalamok mek si nera, Tigris mek, hyok. Anya domnya nera, Efrat mek aboka sibuk.
15 Ban soko enyekan weboka an meeboka bo una' amba dara, Imik Neyung ara, nim enyek doboka, Eren sokok sam beibuk.
16 Anya Imik Neyung ara nim ak ban yub enyek elegok: "Soko enyekan gal doka nidya' ara, or salya' bolowoka delemnelam,
17 bok ban peroba'-malya' ella dangan gal dok era, anda doboka dena' ara hyak mem. Bok anda doboka demen sum era, anda somogamenek anasa mem," aboka lebok.
18 Hnonda Imik Neyung ara lebokja: "Nim ara al beyoka' ok ulumla dara, perob gom. Anasa Nara alsamba araboka domdigum danelenya nenyek," uyiwanamna, hyok.
19 Dara Imik Neyung ara, soko anyek doboka, donggalek beiyik gamyaka' ulumoknya nidya' ab, imik sam gwebdo yabelemok wining nidya' eb, anaso anyek soko winiboka memewok. Ban nidya' ara alja nim adya kemeboka, si siblula' aboka boyok. Dara ban unu nidya' si sibuk dara, an si nenyek diba' dok.
20 Wera, nim adya weilimaknya neb, imik sam gwebdo yabelemak wining eb, donggalek beiyik ulumaknya nera, si yok-yok sunuboka siru byuk. Bok alsamba dara, hnon domdigum dangoka arawanesonya nera, eibnenggubuk.
21 Anasa wera, Imik Neyung ara, nim enyek loba' hogung mayiwok; an unubok anasa salya' mabok salek enyek, Imik Neyung ara alak ab yaija' yoka hnonok gaboka dobookanya, dobok diliga' ak ara ono' sob adya doboka liliwok.
22 Dara Imik Neyung ara, nimik ab dobok yaija' yok era gela hnonok memeboka bukiyiwookanya, nim ek an boyok.
23 Anya ban nim adya lebok ara: "Wera alda ban gel gera, nadya yok ak ab domla yok; anya hnonda nadya sobok ak ab domla sob. Alda nenya ak ab domla. Anasa wera, alda gel alemnemak," hyok.
24 Wera anesa, nimi be hnon alja' neyung-genong ak ab lobnamlakanya, alja gel geb neika' hibnerak. Unuwanerak adya, sikda hnonok nong danerak.
25 Ban nim ab, alja gel geb dara, sikda nong baneng ulurek bok, sikda alya dabnenggulusuk.

Thank you to Roger Doriot for supplying this information. The Doriots are working in the jungles of Papua (formerly Irian Jaya), Indonesia. They welcome your prayers.