Da Good An Spesho Book

Da Jesus Book

Cuz everybody do bad kine stuff. Dass why nobody can come awesome by demself, da way God like make um c awesome. Fo Da Rome Peopo 3:23

Dis da deal: wen you do da tings you not suppose to do, den you cut yoaself off from God. But get one nodda deal dat God get fo you. He like give you someting dass plenny good -- da real kine life dat stay to da max foeva. An you get dis wen you stay tight wit Jesus Christ, our Boss. Fo Da Rome Peopo 6:23

God like do plenny fo you guys, cuz dass how he stay. He like hemo you guys from da bad kine stuff you guys stay in, if you guys trus God strait out. No mo notting you guys can do by yoaself. God make lidis fo you guys. Dass jalike one spesho present God get fo you guys. Da tings you do by yoaself, eh, no talk big, cuz no worth notting. Fo Da Efesus Peopo 2:8-9

But da guy dat take money fo tax wen stand up far away. He no even like look up to da sky, but he beat on his chest an say, 'God, I one guy dat wen do bad kine stuff. Give me chance!'-" Luke 18:13

God wen get so plenny love an aloha fo da peopo inside da world, dat he wen send me, his one an ony Boy, so dat everybody dat trus me no get cut off from God, but get da real kine life dat stay to da max foeva. You know, God neva send me, his Boy, inside da world fo punish da peopo. He wen send me fo take da peopo outa da bad kine stuff dey doing. John 3:16-17

Wen you guys get chance fo do da bad kine stuff, dass da same ting, jalike wat happen to all da odda peopo. But you know, you guys can trus God fo do wat he say. He no goin let you guys get so plenny presha dat you guys no can handle. Everytime get presha lidat, God goin make um so you guys can get outa dat. He goin make you guys strong fo handle, an no fall down. Numba 1 Fo Da Corint Peopo 10:13

I shua bout dis: No mo notting can make God stop loving us guys. No matta if we stay alive o we mahke, no matta if get angel guys o leada guys in da sky, o if get spirits wit power dat go agains us, no matta wateva stay happen now o goin happen bumbye, no matta get guys wit power up dea inside da sky, o down dea inside da groun, no matta get all kine odda kine tings dat God wen make -- no mo notting dat can hemo us from God, so he no love us no moa! Cuz us guys stay tight wit Jesus Christ, da Spesho Guy God Wen Send, an he our Boss. Fo Da Rome Peopo 8:38-39

Christ wen do everyting fo us get um right wit God. Wit ony da Rules, no can do dat. Now, whoeva go trus Christ, dey da ones dat goin get um right wit God. Fo Da Rome Peopo 10:4

God wen say dis inside da Bible, "I wen hear you at da right time. I wen kokua you, da time I like get you outa da bad kine stuff." Eh, lissen! Now da right time fo God get you outa da bad kine stuff you stay in! Numba 2 Fo Da Corint Peopo 6:2

Wen da peopo hear dat, dea heart come sore, an dey tell Peter an da odda guys Jesus wen send all ova, "Bruddas, wat we goin do?"
Peter tell dem, "Every one a you guys gotta come sorry an stop doing all da bad kine stuff you stay do, an get baptize fo show you Jesus guys. He da Spesho Guy God Wen Send. Den he goin let you guys go, an hemo yoa shame fo all dat bad kine stuff, an he goin give you his Spesho Spirit." Jesus Guys 2:37-38

You guys gotta start fo live da new kine way. God wen make dat new kine life so you guys can come jalike him. Den you guys goin be fo real an be good an spesho fo God, an live da true way. Fo Da Efesus Peopo 4:24

Fo Da Rome Peopo

Cuz everybody do bad kine stuff. Dass why nobody can come awesome by demself, da way God like make um c awesome. Fo Da Rome Peopo 3:23

Jalike da Bible wen say, "No mo nobody dat do da right ting everytime. No mo even one guy!" Fo Da Rome Peopo 3:10

So den, from da start befo time, da first man Adam, he da one wen start fo do da bad kine stuff. Az why God neva let um live foeva. An from dat time, all da peopo inside da world make jalike dat man. Cuz dey make lidat, same ting jalike dat man, dey all gotta mahke. Fo Da Rome Peopo 5:12

Wen we neva have power notting, Christ wen mahke fo all us guys dat wen ack jalike God no matta. Dass da time God wen pick. Fo Da Rome Peopo 5:6

But den God wen show how plenny love an aloha he get fo us, cuz same time we was doing bad kine stuff, Christ still yet wen go mahke fo us. Fo Da Rome Peopo 5:8

But how his spirit stay, an da way he stay good an spesho fo God, dass wat show dat he God's Boy. We know dat, cuz God wen use plenny power fo make um come back alive afta he wen mahke. You know, I stay talking bout Jesus Christ. He da Spesho Guy God Wen Send. He stay da Boss fo all us guys. Fo Da Rome Peopo 1:4

We know dat Christ wen come back alive afta he wen mahke, an he no goin mahke again. Cuz no mo notting dat get power fo make him mahke one mo time. Fo Da Rome Peopo 6:9

Dat mean, if you talk strait wit yoa own mout, "Jesus, he my Boss," an you trus deep inside yoa heart dat God wen bring Christ back alive afta he wen mahke, den God goin hemo you from da bad kine stuff you stay doing. Fo Da Rome Peopo 10:9

Cuz da Bible say, "Everybody dat aks da Boss fo help um, he goin take um outa da bad kine stuff dey doing." Fo Da Rome Peopo 10:13

God, you our Fadda

'God, you our Fadda.
You stay inside da sky.
We like all da peopo know fo shua how you stay,
An dat you stay good an spesho,
An we like dem give you plenny respeck.
10We like you come King fo everybody now.
We like everybody make jalike you like,
Ova hea inside da world,
Jalike da angel guys up inside da sky make jalike you like.
11Give us da food we need fo every day.
12Hemo our shame, an let us go
Fo all da kine bad stuff we do to you,
Jalike us guys let da odda guys go awready,
An we no stay huhu wit dem
Fo all da kine bad stuff dey do to us.
13No let us get chance fo do bad kine stuff,
But take us outa dea, so da Bad Guy no can hurt us.
[Cuz you our King,
You get da real power,
An you stay awesome foeva.
Dass it!]' Matthew 6:9-13

Jesus Wen Born

1 Dat time, da king fo da Rome peopo, Cesar Augustus, wen make all da peopo sign up fo find out how much peopo get every place. 2 Dis da first sign up dey wen make wen Quirinius stay governa fo Syria. 3 Everybody wen go back to da town dea ohana come from fo sign up.
4 So Joseph wen go from Nazaret town Galilee side, to Betlehem Judea side, King David's town, cuz he come from King David's ohana. 5 He go ova dea fo sign up wit Mary, da wahine da ohana wen promise fo marry him. She stay hapai. 6 Wen dey stay dea, da time come fo her fo born her baby. 7 An she wen born her numba one boy, an wrap him up inside some cloths, an lay him down inside one ting fo hold da cows food, cuz no mo room fo dem inside da small hotel.
Da Sheep Farmas An Da Angel Messenja Guys
8 Dat nite, ova dea inside da fields, get sheep farmas taking care dea sheeps. 9 Right den an dea one angel messenja guy from da Boss Up Dea Inside Da Sky come by dem. All aroun dem one awesome light wen shine from da Boss. An dey wen come real scared. 10 But da angel guy say, "No scared. I come fo tell you guys Good Stuff From God dat goin make you guys an all da peopo stay good inside. 11 Dis day inside King David's town, one boy wen born dat goin take you guys outa da bad kine stuff you stay doing. He da Christ Guy, da Spesho Guy God Wen Send. He da Boss. 12 Dis how you goin know him. You goin find one baby dat stay wrap up inside plenny cloths, lying down inside one ting fo hold da cows food."
13 Right den an dea uku paila angel guys from da sky wen show up wit da first angel guy. Dey saying good stuff bout God lidis:
14 "Up inside da sky wea God stay,
He stay awesome!
An ova hea on top da earth,
If God like wat peopo doing,
He goin make dea heart rest inside."
15 Den da angel guys wen go way from dem an go back by God inside da sky. Da sheep farmas tell each odda, "Eh brahs, we go Betlehem fo see dis ting dat wen happen, dat da Boss Up Dea Inside Da Sky wen tell us."
16 So dey run an find Mary an Joseph, an da baby stay dea, lying down inside one ting fo hold da cows food. 17 Wen dey see da baby, dey tell everybody wat da angel guys wen say bout dis boy. 18 Everybody dat wen hear dat, stay tinking bout wat da sheep farmas wen tell dem. 19 But Mary wen put all dese tings inside her heart, an tink plenny how spesho dey stay. 20 Da sheep farmas wen go back, an dey tell everybody how God stay plenny good an awesome, cuz all da stuff dey wen hear an see, was jalike da angel guy wen tell dem.
Luke 2:1-20

Da Start 1-2

God Make Da World
1:1 Da time wen eryting had start, God wen make da sky an da world. 2 Da world come so no mo notting inside, no mo shape notting. On top da wild ocean dat cova eryting, neva had light notting. Ony had God Spirit dea, moving aroun ova da watta.
Day Numba One
3 Den God say, "I like light fo shine!" an da light start fo shine. 4God see how good da light. Den he put da light on one side, an da dark on da odda side. 5Da light time, he give um da name "Day time." Da dark time, he give um da name "Nite time." So, had da nite time an da day time, az day numba one.
Day Numba Two
6 Den God say, "I like get someting inside da middo, fo no let da watta up dea an da watta undaneat come togedda!" 7 An dass wat God wen do. God make someting fo no let da watta up dea an da watta undaneat come togedda. 8 Da ting inside da middo, God give um da name "Da Sky." Had da nite time an da day time, az day numba two.
Day Numba Three
9 Den God say, "I like da watta unda da sky come togedda one place, so dat get dry land!" An dass wat God wen do.
10 Da dry groun, God give um da name "Land," an da watta dat wen come togedda one side, he give um da name "Sea." God look da dry groun an da sea, an he tell, "Real, real good, all dat!"
11 Den God say, "I like da land, get all diffren kine plant grow! Da kine plants dat make dea own kine seed, an da kine trees dat make da fruits wit da seed inside, eryting!" An dass wat God wen do. 12 So da land wen make all diffren kine plant grow, da kine plants dat make dea own kine seed, an da kine trees dat make da fruits wit dea own kine seed inside, eryting. An God look da plants, an he tell, "Real, real good, all dat!" 13 Had da nite time an da day time, az day numba three.
Day Numba Four
14 Den God say, "I like put lights up dea inside da sky! Dass fo make da day time diffren den da nite time. Dass fo show da time fo do tings, an da odda kine days fo do someting, an da years. 15 I like get lights up dea inside da sky, fo make light all ova da world!" An dass wat God wen do. 16 God make da two big lights. Da big light, he make um fo be da main one day time, an da odda light, he make um fo be da main one nite time. He even make da stars too. 17God put da lights up dea inside da sky, fo make light shine on top da groun, 18 day time an nite time, an fo make da light an da dark diffren. An God look da day an da nite, an he tell, "Real, real good, all dat!" 19 Had da nite time an da day time, az day numba four.
Day Numba Five
20 Den God say, "Inside da watta, I like get choke diffren kine fishes an odda kine tings dat live dea! Up inside da sky, I like get plenny bird an any kine tings dat fly up ova da groun!" 21 God make all da big kine fishes an odda kine tings dat live inside da ocean, an choke plenny small kine fishes an odda kine tings dat move aroun inside da watta, an all kine birds an bugs wit wings. An God look da tings inside da watta an da tings dat fly, an he tell, "Real, real good, all dat!" 22 Den God tell da fishes an birds an all da odda kine life, "I give you da powa so you can do eryting I wen make you fo do. So, I like you get plenny bebes, an fill up da ocean wit um. You birds too, I like you fo do da same ting an fill up da world!" 23 Had [da] nite time an [da] day time, az day numba five.
Day Numba Six
(Matthew 19:4, Mark 10:6, James 3:9)
24 Den God say, "I like da land make all kine diffren tings! da animals dat live wit peopo, an da small kine animals, an da wild animals." An dass wat wen happen. 25 God wen make um all: all kine wild animals, an all kine animals dat live wit peopo, an all da small kine animals dat run aroun on top da groun. An God look da animals, an he tell, "Real, real good, all dat!"
26 Den God say, "Now, I like make peopo. I like dem be like me, jalike one copy. Dey goin be in charge a eryting: da fishes inside da ocean, da birds inside da sky, da animals, all da land, an all da small kine animals dat go aroun on top da groun." 27 So God make da peopo, same same jalike one copy a him. Fo start, he make one guy an one wahine. 28 Den God tell um, "I give you guys da powa so you can do eryting I wen make you fo do. So, get plenny bebes, an fill up da world wit um, an take ova! You guys in charge a da fishes inside da ocean, an da birds inside da sky, an all da animals dat move aroun on top da groun."
29 An God say dis too: "You know wat? I give you guys all da plants all ova da world dat make seed, an all da trees dat make fruits wit da seed inside. Dat fo you guys eat. 30 An fo all da wild animals, an fo all da birds inside da sky, an fo all da animals moving aroun on top da groun -- eryting dat stay alive, I give dem all da grasses an odda kine green plants fo dea food." An dass wat God wen do.
31 God look eryting he wen make, an he say, "Real, real good, all dat!" An had da nite time an da day time, az day numba six.

Day Numba Seven
(Hebrews 4:4, 10; 6:8)
2:1 Az how God wen finish make da sky, an da world, an all da tings inside dem. 2 Wen da day numba seven come, God was pau awready wit da work he was doing. 3 God say, "Day numba seven, dass da bestes day!" He make dat day da spesho day fo him. Cuz dat was da day wen he pau make eryting an no need do moa. 4 An dass da story bout how was, wit da sky an da world, wen God wen make um.
God Make Da Firs Guy
(Matthew 19:5; Mark 10:7-8; 1 Corint 6:16, 15:45, 47; Efesus 5:31)
Dat time, wen God, da one dey call Yahweh, wen make da world an da sky, 5 all ova da world, neva even have bushes inside da fields. Neva have grass dat come up inside da fields, cuz da God Yahweh neva make da rain come down on top da groun yet, an cuz neva have nobody fo work da groun. 6 Had fog come up outa da groun, an da dew from dat was da ony watta dat da land get, dat time.
7 Den da God Yahweh take dirt from da groun an make one guy. God blow on top his face fo make da guy come alive. Az how da guy get life inside him.
God Put Da Guy Inside One Place Wit Trees
8 Da God Yahweh wen plant plenny trees one place ova dea Eden side, da east side. Dass wea he put da guy he wen make. 9 Da God Yahweh make um grow outa da groun, all nice kine tree you like look at, da kine dat make fruits good fo eat. Inside da place wit all da trees, inside da middo, had one Tree Dat Can Make You Live Foeva if you eat da fruit, an one Tree Dat Can Make You Know Wass Good An Wass Bad if you eat da fruit. 10 Had one riva dat come up inside Eden an give watta fo all da trees inside dat place. Outside, da riva split up an come four diffren riva. 11 One riva get da name Pishon, an go aroun da outside Havilah land. (Dass da place wea get gold inside da groun, 12 da bestes kine gold, an gum from one tree fo make perfume, an rocks da kine fo make jewelry.) 13 One nodda riva get da name Gihon, an go aroun da outside Cush land. 14 One nodda river get da name Tigris, da one dat go by Assyria on da east side. Da odda river, dass da Eufrates Riva.
God Tell Da Guy Wat He Gotta Do
15 Da God Yahweh wen put da guy inside Eden, da place he wen plant all da trees, fo live dea an work da groun an take care eryting. 16 God tell um wat he gotta do, "All da trees inside dis place, you can eat da fruits from dem, wateva you like. 17 Ony one tree -- da Tree Dat Get Fruits Dat Can Make You Know Wass Good An Wass Bad, no eat da fruit from dat. Cuz wen you eat dat fruit, den you goin get cut off from me, an you goin mahke fo shua!"
Da Guy Stay Alone By Himself
18 Den da God Yahweh tell, "No good da guy ony stay alone by himself. I goin make somebody fo him, jalike him but diffren, dat goin kokua him." 19 Befo time, da God Yahweh take dirt from da groun an make all da diffren kine wild animals an all da diffren kine birds in da sky. He bring um all in front da guy, fo find out wat name da guy goin give um. Eryting dat stay alive, da name dat da guy give um, dass da name dey goin get. 20 So da guy give name to all da kine animals dat live wit peopo, an all da kine birds in da sky, an all da kine wild animals. But still yet, da guy neva find one a dem dat stay jalike him but diffren, fo kokua him.
God Make Da Firs Wahine
21 Den da God Yahweh make da guy lay down an go pass out sleep. Wen da guy sleeping, God take one rib outa him, an den close up da place wit skin. 22 Den da God Yahweh make one wahine outa da rib. He make her go by da guy.
23 Da guy say,
"Now, dis one, jus right fo me!
She da wahine fo me.
Her bones, come from my bones,
Her skin, come from my skin.
Dis one, I goin give her da name 'Wahine,'
Cuz God wen take her outa me, one guy."
24(Dass how come da guys go way from dea fadda-mudda guys, an come tight wit dea wife, an da guy an da wahine, dey come jalike dey one.)
25 Now even so, da guy an da wahine was naked, but dey neva have shame from dat.

HPB Bible read
HPB Bible listen
HPBM Da Voice of Aloha, fo real kine
Pidgin Bible Hawaii

Copyright © 2000, 2009 Wycliffe Bible Translators