Tnalù i Dwata

Hae, du kdee dad to slame gamsalà di Dwata. Na gawag ale di knayè Dwata di dale. Roma 3:23

Én mangu ani gine too glut du ku nun to saligan i kton di sasè knayè i lawehan nun untungan kadang dunan fati landè gusenan. Kabay én to faglut di ku Krayst Dyisas Amuito nun untung blé Dwata di kenen landè bayad dunan nawa landè gusenan. Roma 6:23

Du tatì mdà di kablén i kafye di gito falwaan ito mdà di kaflayam landè sen fagu di kafaglutito di ku Dyisas Krayst. Du ise én gafalwà gito én mdà di gito fye nimò, bay alò mdà di knayè i Dwata. Taman, landè to fakay mdag i kton, du ise én duenito galwà ku mdà di fye nimoito. Ifisus 2:8-9

Kabay én to tyà mwè bayad i knun tadag kenen dtù di mawag déén di lam i syung i bali én, na balù lngalà dtù di langit là, na ntungan i kfen di kliduan na dmasal kenen di Dwata, manan, 'E Dwata, kandom agu du agu satu to too gamsalà!' Én i dasalan. Luk 18:13

Du Dwata toon kanbong nawa kdee dad to di tah tanà ani, taman blén i Tingaan tunggal, du fye ku sinto faglut di kenen là ale malmo di salàla, kabay nun nawala landè sen. Du là tì febe Dwata i Tingaan dini di tah tanà du mlayam i dad to, bay feben kenen du kenen falwà dad to di dad salàla. Dyan 3:16-17

Na ku tnabug gamu Satanas mimò sasè, fandamyu sa na salngad én kagkah i kdee dad to di tah tanà. Kabay Dwata too gsalig tmabeng gamu, du laan falo di gamu én tabug i làyu gagan knagol. Kabay, ku nun tabug kel di gamu tnabeng gamu i Dwata kmagol i tabug én, du fye gamtayud gamu di kafaglutyu. 1 Korintu 10:13

Na toogu gadè landè fakay samkah gito di kakdo Dwata i fiten di gito fagu di ku Dyisas Krayst Amuito. Du balù mto ito fa ku demen mati ito landè fakay samkah gito di kakdon gito. Na balù dad kasaligan demen i dad busaw nun glal là ale fakay samkah gito di kakdo Dwata gito. Landè kel di gito ani ku demen di fulé duh kadang fakay samkah gito di kakdo Dwata. Balù tan kgal i tulus di tah langit ku deman di dungan i tanà, na balù tan i dademe tamgimò di klamang i banwe knean landè sa fakay samkah gito di kakdo Dwata én tanfunito fagu di ku Krayst Dyisas Amuito. Roma 8:38-39

Du mdà di ku Krayst Dyisas landè nan gukmamu kimen i kated. Taman balù sinto, alò mdà di kafaglutan ku Krayst i gumatlun di kite i Dwata. Roma 10:4

Du én tagman i Dwata di ku Krayst manan, "Di bang i kayègu, flinge agu ge, na di duh i kagalwà, tmabeng agu ge." Én gman i Dwata. Na fanlingeyu agu. Mangu di gamu, du takel nan Krayst ani i duh flinge Dwata i dad to, na ani i duh falwaan i dad to mdà di fati landè gusenan. 2 Korintu 6:2

Kaklingela i gman Fiter, too matdel i nawala, na smalek ale ku Fiter uman én dademe gal dek Dyisas, "Dad flanekmi, tan sa dé i kibòmi nan?" Na man Fiter di dale, "Kat satu gamu msal na tagakyu dad salàyu én, na fbunyag gamu di dagit Dyisas Krayst, du fye nlifetan i salàyu, na banlé gamu i Dwata én Mtiu Tulus. Dad Nimò 2:37-38

Na too là fakay ku làyu too fafalami i Dwata én nawayu. Du Dwata sa fnalamin i nawayu, na fsalngadan én kenen nawa, du fye matlu gamu na fye gimòyu én knayè i Dwata. Ifisus 4:24

Roma

Hae, du kdee dad to slame gamsalà di Dwata. Na gawag ale di knayè Dwata di dale. Roma 3:23

Du nun gman di Tnalù i Dwata fsulatan kye manan, "Landè to matlu déén di kite i Dwata, balù satu landè." Roma 3:10

Én mangu ani gine too glut du ku nun to saligan i kton di sasè knayè i lawehan nun untungan kadang dunan fati landè gusenan. Kabay én to faglut di ku Krayst Dyisas Amuito nun untung blé Dwata di kenen landè bayad dunan nawa landè gusenan. Roma 6:23

Én duen nun salà dini di tah tanà ani du mdà di kagsalà i satu to dnagit ku Adam. Na mdà di salaan én là fakay ku laan mati. Na fandà déén én fati mbel di klamang banwe. Taman, én kdee dad to mati du landè to i là gamsalà. Roma 5:12

Én tooito fandam én kafye blé Dwata di gito. Du di bang fala fandam Dwata, di landè kiboito falwà i ktoito, mati Krayst du tlas gito dad gamsalà. Roma 5:6

Kabay Dwata mahal, du fiten i kalbong nawan gito du fafati Dyisas tlas gito di bang ito fa mimò too sasè. Roma 5:8

Na Dyisas Krayst Amuito ani, kenen i too glut Dwata du kenen dù Tingà i Dwata. Du én tagfite di gito fagu di kgal tulus i Dwata di ktékan kenen mdà di fati. Roma 1:4

Du gadeito tamték nan Dyisas Krayst mdà di fati na talaan nan uman mati du landè nan gal i fati di kenen. Roma 6:9

Na ku tmulen ge i dademe Dyisas too glut Amu na ku too ge faglut na nték Dwata Dyisas mdà di fati, galwà ge mdà di kaflayam Dwata i dad to. Roma 10:9

Du nun gman di Tnalù i Dwata manan, "Sinto mni tabeng di ku Dyisas Krayst i Amu, galwà kenen di kaflayam Dwata i dad to. Roma 10:13

Na toogu gadè landè fakay samkah gito di kakdo Dwata i fiten di gito fagu di ku Dyisas Krayst Amuito. Du balù mto ito fa ku demen mati ito landè fakay samkah gito di kakdon gito. Na balù dad kasaligan demen i dad busaw nun glal là ale fakay samkah gito di kakdo Dwata gito. Landè kel di gito ani ku demen di fulé duh kadang fakay samkah gito di kakdo Dwata. Balù tan kgal i tulus di tah langit ku deman di dungan i tanà, na balù tan i dademe tamgimò di klamang i banwe knean landè sa fakay samkah gito di kakdo Dwata én tanfunito fagu di ku Krayst Dyisas Amuito. Roma 8:38-39

alò ge i Dwata

Màmi déén di langit, alò ge i Dwata. Kayèmi moon ku kdee dad to mangamfù di ge. Ge i Gumdatah. Kayèmi ku ge magot i kdee dad to, na ku mgimò kdee knayeam dini di tah tanà salngad kagkah déén di langit. Blém gami én gablà knaanmi di duh ani. Na nlifetam i dad salàmi, salngad i klifetmi salà én gamsalà di gami. Na nangam falo di gami én dad malima tilew gamgebe gami di salà, na falwaam gami di sasè mdà di ku Satanas. Gambet ani kdasalyu. Matyu 6:9-13