Tsoñ'en nn'an nan'xuanhan jnan. Ta'nan ncüii nnon na tsixuan ts'an na ntyja 'naan'han' nninncyaahan' na ntsijonhin yo juu na taquintyja na t'man na condui nquii Tyo'ts'on. Romanos 3:23

Juu tsan na tsixuan jnan tonnon Tyo'ts'on, ngüantjon juu na ncja juu naijon na tyi'quintycüii na m'aan ts'an v'io. Majo' joo nn'an ng'e na vantyja nn'onhin Jesucristo, nquii jon na conduihin na itye'ntjon jon jaa, ve' yu itsiquindaa' Tyo'ts'on joohan na tyi'quintycüii na cota'ndo'han ntyja 'naan' juu Jesucristo. Romanos 6:23

Ee ntyja 'naan' juu naya na condui Tyo'ts'on, jo' na itsin'man jon ñuaanho', ng'e na vantyja n'onho' Jesucristo. Min chito its'aa jon na nnda' ntyja 'naan' ncüii nnon na nan'xuan nqueho'. Nquii jon itsiquindaa' jonhan' 'o'. Min chito its'aa jon na nnda' nge' ncüii nnon cont'a nqueho'. Its'aa jonhan' cha' quitscu'han' na ntsiquinjon ts'an ntyja nchu vaa na its'aa nquii juu. Efesios 2:8-9

Majo' juu tsan'ñeen tsan na ique s'on, toxen'chen tacüentyjee' juu, min na nndondë juu tsjö'ndue, ta'nan. Ve' tomin' juu nda' tsi'jndya juu na totsindyia'hin. Tso juu;: 'U' Tyo'ts'on, c'on' na nty'ia rö nchiji' ng'e ts'an jnan ja. San Lucas 18:13

Nquii Tyo'tson t'man jndyi vaa na vi'nchjii jon nn'an tsonnangue, jo' nquii Jnda jon na nincüii ts'onhin, tyincyaa jonhin na ndyion jon jnan nn'an. Ndö' vaa na its'aa jon, cha' min'cya ro ts'an na vantyja ts'on juuhin, tyi'xe'quitsu ñuaan' juu, tsixuan juu na tyi'quintycüii na vando' juu. Ee chito jñon Tyo'ts'on Jnda jon ndëë nn'an tsonnangue, cha' quit'uiivi'han'hin tsojnaan' jnanhan. I'ua Tyo'tson ts'ian'ñeen nnon Jnda jon na ntsin'man jon ñuaan nn'an. San Juan 3:16-17

Ee 'nan na coquenonho' na ityii'han' ng'eehan' 'o' na quinan'tjaho' tonnon' Tyo'ts'on, manin'cüejonhan' cha'xjen na coquenon tsoñ'en nn'an. Majo' itsiquendë jon jñ'oon na jndë tco' jon 'ndyo jon, ee xia'ntyi 'nan na ntyjii jon na nndëë nnanho', mantyjantyi jo' ro na ncyaa jon na ngenonho'. Ndo' ngüañoon' jonho' quityquii'han' cha' nndëë nnanho' yohan'. 1 Corintios 10:13

Mang'e jo' mantyji ya na juu na m'aan Tyo'ts'on na vi'ntyjii jon nn'an, min'ncüii nnon 'nan je'quindëë nts'aahan' na nt'ioo'han' yo ntyja njanhan. Xe'quits'aahan' min na conan'cüje nn'an jaa, min tsoñ'en ntyja na cotsam'an, min' ángeles na m'an quiñoon'ndue tyi'je'quindëë nnt'ahan, min ángeles tyia na conintque, tyi'je'quindëë nnt'ahinhan', min nn'an na conintque tsonnangue, min joo 'nan na coquenön nanein, min joo 'nan na ngenön yandë, min nque natyia na conintque na conan tondye, min nque na conintque na m'aan tocjee' tsonnangue, min min'cya ro na tsoñ'en na tquen Tyo'ts'on. Min'ncüii min'ncüiihan' tyi'je'quindëë na nt'ioo'han' na m'aan Tyo'ts'on na vi'ntyjii jon jaa xeng'e nquii Jesucristo na conduihin na itye'ntjon jon jaa. Romanos 8:38-39

Ncüii cüii ts'an na vantyja ts'on Cristo, jndë tëcüentyjee' juu na itsichon juu na itsiquindë juu jñ'oon na tquen Moisés na ico'xenhan' cha' ntyja 'naan' jo' ntquen' Tyo'ts'onhin na conduihin ts'an na tajnaan' juu. Ee xia'ntyi ityii' jon ts'an na tajnan tsixuan juu xe na aa vantyja ts'on ju Cristo. Romanos 10:4

Ng'e nacjoo' jñ'oon' jon na jndui itso jon: Majuu xjen na sitiu na ncy'ön na vi'ntyji ja 'u', majuuto xjen'ñeen tquën cüenta jñ'oon na tcan' nnön. Majuu xuee na sitiu na ntsin'man ñuan 'nan', majuuto xuee'ñeen sijnt'a na tejndei 'u'. Nnda' vaa na tso jon. Naneinhin quitquenho' cüenta, xjenvahin na m'anho' naneinhin, majuuto xjen na vi'ntyjii jon 'o'. Quitquenho' cüenta, naneinhin xjen na m'anho', majuu xjen na itsin'man jon ñuaanho'.2 Corintios 6:2

Ndo' nque nn'an Israel'ñeen, vi na jndë jndyehan jñ'oonmin', t'man jndyi vaa na si'ndaa'han' ngiohan. Ncüii cüiihan jnduehan nnon Pedro yo ntyje jon nn'an na cotsay'onhan yo jñ'oon na toninncyaa Jesús: --'O' ntyjë, ng'e na nnda' vaa, ¿Nin 'nan icanhan' na quint'á? Ndo' sintcüe' Pedro jñ'oon ndëë nan'ñeen, tso jon: --Ncüii cüiiho' quintcüe' n'onho' yo njanho', ndo' quint'ëho' yo xuee' Jesucristo, cha' ndëë ntsit'man ts'on Tyo'ts'onho' jnanho'. Ndo' nninncyaa jon na ncy'onho' cüenta Espíritu Santo quii' n'onho'. Los Hechos 2:37-38

Quityquii' na cotsam'anho', chuhan' na nnintyincyoo' na conduiho' nn'an xco, ts'ian na nquii Tyo'ts'on its'aa jonhan', na cüityincyoo'han' nchu vaa na its'aa ts'an 'nan na chuhan' ndo' na vam'aan juu na ñuaan nquii'hin cha'xjen condui nquii jon. Efesios 4:24

Romanos

Tsoñ'en nn'an nan'xuanhan jnan. Ta'nan ncüii nnon na tsixuan ts'an na ntyja 'naan'han' nninncyaahan' na ntsijonhin yo juu na taquintyja na t'man na condui nquii Tyo'ts'on. Romanos 3:23

Ng'e joo jñ'oon' Tyo'ts'on na jndui, itsinin jndyoyuhan' ntyja 'naan' jo'. Itsohan': Ta'nan ts'an na ndëë ngitso Tyo'ts'on na its'aa juu cha'xjen na chuhan'. Min'ncüii min'ncüii. Romanos 3:10

Juu tsan na tsixuan jnan tonnon Tyo'ts'on, ngüantjon juu na ncja juu naijon na tyi'quintycüii na m'aan ts'an v'io. Majo' joo nn'an ng'e na vantyja nn'onhin Jesucristo, nquii jon na conduihin na itye'ntjon jon jaa, ve' yu itsiquindaa' Tyo'ts'on joohan na tyi'quintycüii na cota'ndo'han ntyja 'naan' juu Jesucristo. Romanos 6:23

Juu Adán, tsan navejndyee, sitjahin nnon Tyo'ts'on. Ndo' tsojnaan' jo', tquenhan'hin na tsixuan juu jnan, tue' juu, ndo' mang'e na nnda', mantyi tijnda' na tsoñ'en jaa nan'xuan jnan na tonnon Tyo'ts'on, jo' mantyi ncüjë cha'xjen na tue' tsan'ñeen. Romanos 5:12

Quitquenho' cüenta na majuuto xjen na min'ncüii min'ncüii nnon ta'nan nndëë nt'a cha' ntyja 'naan'han' ntsin'man Tyo'ts'on ñuan njanhan, majuu xjen'ñeen tue' Cristo ntyja njan na condui jaa nn'an jnan. Romanos 5:6

Majo' nquii Tyo'ts'on, si'man jndyoyu jon na t'man vaa na venchjii jon jaa. Ee juu xjen na tonan'xuan jnan, xjen'ñeen tyincyaa Cristo na tue' jon ntyja njanhan. Romanos 5:8

Ntyja 'naan' Jesús tji' jndyoyuhan' na conduihin jnda Tyo'ts'on ng'e na tando' xco jon vi na jndë na jnan'cuee' nn'anhin. Juu nan'ñeen, tuihan' ntyja 'naan najndei na condui nquii Espíritu Santo. Romanos 1:4

Ng'e mangiö na nquii Cristo tando'xco jon, jo' tyi'je'cue' nnda' jon ng'e juu na its'aa na covje nn'an taxe'co;xenntyichenhan'hin. Romanos 6:9

Cha' nndëë ntsin'man Tyo'ts'on ñuan 'nan', cüji' jndyoyu' ndëë nn'an na nquii Jesús conduihin na itye'ntjon jon 'u' ndo' yo na xoncüee' tson' cantyja tson' na tyincyaa Tyo'ts'on na tando' xco Jesucristo. Romanos 10:9

Juu Joel sinin jon jñ'oon na jndui na itsohan': "Nquii jon na conduihin na co'xen jon tsoñ'en, ncüii cüii ts'an na i'man juuhin na quitsin'man jon ñuaan' juu, ncy'oon jon cüentahin yo na xoncüee' ts'on jon." Romanos 10:13

Mang'e jo' mantyji ya na juu na m'aan Tyo'ts'on na vi'ntyjii jon nn'an, min'ncüii nnon 'nan je'quindëë nts'aahan' na nt'ioo'han' yo ntyja njanhan. Xe'quits'aahan' min na conan'cüje nn'an jaa, min tsoñ'en ntyja na cotsam'an, min' ángeles na m'an quiñoon'ndue tyi'je'quindëë nnt'ahan, min ángeles tyia na conintque, tyi'je'quindëë nnt'ahinhan', min nn'an na conintque tsonnangue, min joo 'nan na coquenön nanein, min joo 'nan na ngenön yandë, min nque natyia na conintque na conan tondye, min nque na conintque na m'aan tocjee' tsonnangue, min min'cya ro na tsoñ'en na tquen Tyo'ts'on. Min'ncüii min'ncüiihan' tyi'je'quindëë na nt'ioo'han' na m'aan Tyo'ts'on na vi'ntyjii jon jaa xeng'e nquii Jesucristo na conduihin na itye'ntjon jon jaa. Romanos 8:38-39

Tyë` na m'an' quiñoon'ndue

Tyë` na m'an' quiñoon'ndue, quits'aahan' na ninnquii'chen cüit'maan' xue'. Juu na matye'ntjon', quindyo co'xenhan' na vja na m'an. Quindui 'nan na nt'ue tson' nnon tsonnangueva cha'xjen na conduihan' quiñoon'ndue. Ncya' 'nan na icanhan' na ntcü'á xeevahin. Quitsit'man tson' já yo 'nan tyia na jndë jnt'á cha'xjen conan't'man n'ö`n nn'an na conan'tjahin ndë`. Quitejndei' já na tyi'ntyii'han' ng'eehan' ja' na nt'á 'nan na tyi'quichuhan', majo' quitsiquindya' já tsoñ'en nnon 'nantyia na nin'quitsi'ndaa'han' já. Ng'e ntyjantyi xjen na tquen' tsoñ'en, 'u' condui na maco'xen', ndo' condui 'u' najndu', ndo' tsixuan' na tsoñ'en na tquen' na cüit'maan' 'u' ntyja 'naanhan'. Quindui na mac'an. San Mateo 6:9-13

Gálatas